Madaxweynaha Jubbaland oo Goor dhow soo gaaray Magaalada Muqdisho

Madaxweynaha dowlad Goboleedka Jubbaland Axmed Maxamed Islaam Axmed Madoobe iyo wafdi uu hoggaaminaayo ayaa goor dhow soo gaaray Magaalada Muqdisho, iyagoo kasoo ambabaxay Magaalada Kismaayo.

Madaxweyne Axmed Madoobe iyo wafdigiisa ayaa waxaa Garoonka diyaaradaha Aadan Cadde si weyn ugu soo dhaweeyay Wasiiro, Xildhibaano ka tirsan labada Golle ee Baarlamaanka, siyaasiyiin iyo qeybaha kala duwan, isagoo ka mahadceliyay soo dhaweynta.

Ujeedka Madaxweynaha Jubbaland ee Muqdisho ayaa waxaa uu yahay sidii uu uga qeyb geli lahaa Shirka Madaxda dowladda Federaalka iyo kuwa maamul Goboleedyada oo saacadaha soo socda si rasmi ah u furmi doona.

Shirkaan ayaa waxaa looga hadli doonaa fulinta iyo dardar-gelinta heshiiskii 27-kii May 2021 laga gaaray qabsoomida doorashooyinka dalka ka dhacaya, kadib markii ku dhow sanad uu khilaaf ka taagnaa doorashada.

Shirkaan ayaa lagu waday in Maanta oo sabti ah uu ka furmo Magaalada Muqdisho, balse dib u dhac ayaa ku yimid, sababo la xiriira Madaxweyneyaasha maamul Goboleedyada oo intooda badan ka maqan Caasimadda dalka.

About Dalsan Editor

View all posts by Dalsan Editor