Wararka ka imaanaya Magaalada Marka ee Gobolka Shabeellaha Hoose ayaa waxa ay sheegayan in halkaasi uu ka dhacay dagaal culus oo dhexmaray Ciidamada xoogga dalka iyo Dagaalamayaasha Al Shabaab.
Dagaalkan ayaa la sheegay in uu bilowday kadib markii dagaalyahano ka tirsan al shabaab ay weerar ku soo qaadeen gudaha Magaalada,kadibna gudaha marka waxaa ka bilowday dagaal xoogan oo la isku adeegsaday hubka noocyadiisa kala duwan,waxaana dagaalka ka dhashay Khasaaro isugu jira dhimasho iyo dhaawac oo soo gaaray labada dhinac.
Dadka deegaanka Magaalada Marka ayaa sheegay in dagaalka uu si aad ah uga socday Saldhiga Booliska Marka iyo fariisin Ciidamadii xoogga dalka ee uu hoggaaminayay Abaanduulhii hore ee ciidanka xoogga dalka Soomaaliyeed Jenaraal Caanood ka sameysteen gudaha Magaalada iyo meelo kale oo badan.
Ilaa iyo hada lama oga khasaaraha rasmiga ah ee ka dhashay dagaalka ka dhacay Magaalada Marka ee Gobolka Shabeellaha Hoose ee u dhaxeeyay Ciidamada xoogga dalka iyo Dagaalamayaasha Al shabaab.
