Dagaal u dhexeeyay laba maleeshiyo beeleed oo kasoo kala jeeda Magaalooyinka Cadaado iyo Dhuusamareeb ee Gobolka Galgaduud ayaa saakay waxaa uu ka dhacay duleedka deegaanka xananbuure ee Gobolkaas, kaasi oo socday muddo kooban.
Warar la helayo ayaa sheegaya in dagaalka uu salka ku haayo arrimo la xiriira dul-daaqsimeedyo ku yaalla duleedka deegaanka xananbuure, waxaana maleeshiyaadka dagaalamay ay isku adeegsadeen hubka noocyadiisa kala duwan.
Ilaa iyo hataan lama ogo Khasaaraha ka dhashay dagaalkaas, isla markaana waxaa deegaanka gaaray Ciidamo ka tirsan dowladda Federaalka iyo kuwa Maamulka Galmudug oo fariisimo ku leh meel ku dhow xananbuure.
Saraakiisha hoggaamineysa Ciidamada gaaray halka uu dagaalka ka dhacay ayaa wada dadaadlo lagu doonayo in lagu joojiyo dagaalka dhexmaray maleeshiyaadka iyo sidii lagu kala qaadi lahaa labada dhinac.
Si kastaba dagaal beeleedyo geystay Khasaaro isugu jiray dhimasho iyo dhaawac ayaa kusoo lab-laabtay sanadihii ugu dambeeyay deegaano hoostega Xananbuure ee Gobolka Galgaduud, kuwaasi oo ka dhashay dilal la xiriiray aano qabiil iyo dul-daaqsimeedyo.
