Wararka aan ka heleyno degmada Moqokori iyo deegaanka Yasooman ee Gobolka Hiiraan ayaa waxaa ay sheegayaan in halkaas saaka ay isaga soo baxeen Ciidanka dowladda Federaalka Soomaaliya ee dhawaan kala wareegay Al-shabaab.
Qaar kamid ah dadka deegaanada Yasooman iyo Moqokori ayaa soo weriyey in arroornimadii hore ee saaka ay deegaanadaas isaga baxeen Ciidankii dowladda Federaalka ee qabsaday, isla markaana ay kala soo baxeen gaadiidkii dagaal ay wateen.
Ciidamada dowladda ee soo baneeyay labada deegaan ayaa la tilmaamay inay Saldhigteen degmooyinka Maxaas iyo Buulo-burte ee Gobolka Hiiraan, illaa iyo hadda lama oga sababta keentay in Ciidanka ay isaga baxaan halkaas.
Saraakiisha Ciidanka dowladda iyo Maamulka Gobolka Hiiraan oo uu ugu horreeyo Guddoomiye Jeyte Cismaan ayaa weli hadal sababta Ciidanka dowladda u baneeyeen Moqokori iyo Yasooman oo dhawaan kala wareegeen dagaalamayaasha Al-shabaab.
Arrintaan ayaa kusoo aadeysa, iyada maalmihii dambe howlgalo ka dhan ahaa Al-shabaab ka socdeen deegaano dhowr ah oo ka tirsan Gobolka Hiiraan, Al-shabaab ayaa dhowr sanno ku sugnaa degmada Moqokori, waxaana dagaal khasaaro dhaliyey uu khamiistii lasoo dhaafay ka dhacay deegaan hoostega degmadaas.
