Siyaasiga Cabdiraxmaan Cabdishakuur Warsame ahna Hoggaamiyaha Xisbiga Wadajir ayaa ka hadlay Arrimo ku aadan dowladda Qatar ee Soomaaliya, isagoo baaqna u diray.
Qoraal uu soo saaray C/raxmaan C/Shakuur ayaa waxaa uu ku sheegay in dowladda Qatar ay isku dayeeyso in muddo kordhin ay u sameeyso Madaxda dowladda Federaalka Soomaaliya.
Sidoo kale Hoggaamiyaha Xisbiga Wadajir C/raxmaan C/Shakuur ayaa Qatar ugu baaqay inay ay joojiso isku dayga ay muddo kororsiga ugu raadinayso Madaxda dowladda uu hogaamiyo Maxamed Cabdullaahi Farmaajo.
“Dowladda Qatar dhib intii ku filan Soomaaliya way u geysatay. Waxaan ugu baaqaynaa in ay joojiso isku dayga ay muddo kororsiga ugu raadinayso madaxda muddo xileedkoodii idlaaday” ayuu yiri Siyaasiga C/raxmaan C/Shakuur.
Ugu dambeyn Hoggaamiyaha Xisbiga Wadajir ayaa ugu baaqay Mas’uuliyiinta uu dhamaca kaga jiro muddo kororsi in ay ka waantoobaan arrintaas, isla markaana kalsooni is geliyaan, shacabkoodana aaminaan.