Dowladda Imaaraadka Carabta ayaa maanta shaacisay inay 5 ka mid ah Diplomaasiyiintooda lagu dilay qarax shalay ka dhacay magaalladda Khandahaar ee Koonfurta dalka Afganistan.
Madaxweynaha dalka Imaaraadka, Sheekh Khaliifa Bin Saayid Al-nahyaan waxa uu amray in Calanka hoos loo dhigay muddada 3-da maalmood ee ay socotay Baroordiiqa loo samaynayo Diplomaasiyiinta lagu dilay dalka Afganistan.
Wakaalladda Wararka Imaaraadka ee WAM ayaa sheegtay in Weerarka ka dhacay magaalladda Khandahaar lagu dhaawacay Danjirihii u jooga dalka Afganistan, Jumca Maxamed C/llaahi Al-kacbi.
Hadal-qoraal oo ka soo baxay Wasaaradda Arrimaha Dibedda ee Imaaraadka ayaa lagu sheegay in joogitaanka Diplomaasiyiinta Imaaraadka Carabnta ee magaalladda Khandahaar qeyb ka ahayd Hawlgalka dhinaca Samafalka Aadminimadda.
Diplomaasiyiinta u dhalatay Imaaraadka ee lagu dilay qaraxaasi waxaa lagu kala magacaabi jirey Maxamed Cali Zaynal-bastaki, C/llaahi Maxamed Ciise Cubaydi Al-kacbi, Axmed Rashiid Saalim Cali Al-marsuuqi, Axmed C/raxmaan Axmed Al-tunayji iyo C/xamiid Suldaan C/llaahi Ibraahim Al-xamadi.
Dhinaca kale, Saraakiisha dalka Afganistan ayaa sheegay in qaraxa Khandahaar lagu dilay ugu yaraan 7-qof, iyadoo 18 kale oo uu ka mid yahay Safiirka Imaaraadka lagu dhaawacay.
©Radio Dalsan
