Madaxweynaha dowlad Goboleedka Jubbaland Axmed Maxamed Islaam ayaa cambaareeyay Weerarka ay Al-Shabaab maanta ka gaysteen Xarunta Degmada Hodan ee Magaalada Muqdisho.
Madaxweynahu wuxuu Allaah uga baryay dadkii goobtaas ku dhintay in uu Naxariistii jano ka waraabiyo kuwa dhaawaca ahna ay Caafimaad deg deg ah xaga rabi ka helaan.
Madaxweynahu wuxuu sheegay in Al-Shabaab ay leedahay hal hadaf oo ah in ay dilaan qof walba oo aan iyaga kamid ahayn wuxuu sheegay in Shacabka Soomaaliyeed looga baahan yahay in ay gacmaha is qabsadaan oo aanay ogolaan in maalin walba qaar iyaga kamid ah ay xaqdaro ku dhintaan.
Madaxweynahu wuxuu sheegay in Dowlada Federaalku ay ka gaabisay masuuliyadii ka saarnayd Amniga iyo Xoraynta dalka taa badalkeedana ay khalkhal iyo shaqaaqooyin ka abuurayso deegaano nabdoon iyadoo taasi ay fursad u siisay Al-Shabaab in ay gaystaan weeraro ay dadka shacabka ah iyo Xarumaha Dowlada ku beegsanayaan waxaa kale oo Madaxweynahu uu sheegay in Gobolada qaar ay dib usoo noqdeen dagaaladii qabaa’ilka iyo awoodii Al-Shabaab.
