Shalay ayaa qorshuhu ahaa in uu furmo shirka Golaha Iskaashiga Dowlad goboleedyada dalka ka jira balse uu dib u dhacay waxyaabo lagu sababeeyey dhowr qodob oo ilaa iyo hadda aan la cadeyn.
Xoghayaha Golaha Iskaashiga Dowlad Goboleedyada Cabdi Cali Raage oo warbaahinta la hadlay ayaa wuxuu shalay sheegay in Maanta oo talaado ah shirkaasi furmo doono,isla markaana shalay uu u baaqday sababo la xiriiray Madaxda qaarkood oo ka soo daahay imaanshaha Magalada Kismaayo.
Shirka Madaxda Dowlad Goboleedyada ayaa waxaa shir guddoomin doona Guddoomiyaha Golaha Iskaashiga Dowlad goboleedyada Cabduweli Maxamed Cali Gaas,waxana ay uga hadli doonaan qeybsiga kheyraadka, dib u dhiska ciidanka, xaalada dalka, iyo xiriirka dowladda iyo dowlad goboleedyada.
Shirka ayaa waxaa goobjoog ka noqon doona Wakiilka Qaramada midoobey ee Arrimaha Soomaaliya Michael Keating oo shalay gaaray Magalada Kismaayo ee Xarun Goboleedka Jubbada Hoose.
Amniga Magalada Kismaayo ayaa aad loo adkeeyey gaar ahaan Xarunta Guriga Martida halkaas oo la filayo in Maanta uu shirkaasi ka furmo.