Hoggaamiyahii hore ee Aqlabiyadda Baarlamaanka dalka Kenya Aadan Barre Ducaale oo ka hadlaayay Munaasabad ka dhacday Magaalada Nairobi ayaa baaq u diray Madaxda dowladda Federaalka iyo kuwa maamul Goboleedyada.
Aadan Barre ayaa waxaa uu sheegay in Madaxda Soomaalida looga baahan yahay in Go’aanada ay gaarayan noqdaan kuwa ay ku jirto danta dalka iyo dadka Soomaaliyeed, isla markaana xaliyaan wax kasta oo khilaaf ah.
Hoggaamiyahii hore ee Aqlabiyadda Baarlamaanka dalka Kenya ayaa Madaxda dowladda Federaalka iyo kuwa maamul Goboleedyada ugu baaqay inay iyagu tashadaan, ayna gaaran go’aan, balse aysan qaadan waxyaabaha ay u meeriso Beesha Caalamka.
“Waxaan ugu baaqayaa madaxda dowladda federaalka, hogaamiyeyaasha gobolada iyo siyaasiyiinta gaar ahaan Farmaajo in marka aad tashaneysaa aad go’aanadiina ku saleysaan danta Soomaaliya oo aysan idin meerin dowladaha derisa ama kuwa Carabta,” ayuu yiri Aadan Barre Ducaale.
Hadalka Hoggaamiyahii hore ee Aqlabiyadda Baarlamaanka dalka Kenya Aadan Barre ayaa waxaa uu kusoo aaday, iyada oo dhawaan Madaxda Soomaalida ay heshiis rasmi ah ka gaareen khilaafkii hareeyay qabsoomida doorashada dalka.
