Goobaha codbixinta ayaa bilaabanaya in ay xirmaan dalka Mareykanka Maanta oo arbaco ah, iyadoo Madaxweynaha Jamhuuriga Donald Trump iyo ninka la tartamaya ee Dimuqraadiga, Madaxweyne kuxigeenkii hore Joe Biden, ay sugayaan in saraakiisha doorashooyinku ay soo saaraan tirinta ama natiijada ugu horreysa ee codabixinta tartanka sida weyn loogu loollamay ee loogu jiro ciddii noqon laheyd madaxweynaha Mareykanka afarta sano ee soo socota.
Iyadoo goobaha codbixinta la xiray gobolka ku yaalla bartamaha dhexe ee Indiana iyo gobolka deriska la ah ee Kentucky saacaddu marka ay ahayd 6-da maqribinomo ee waqtiga maxalliga ah, dadka ayaa wali sii waday in ay ka codeeyaan gobollada Bariga iyo dhammaan Galbeedka Mareykanka.
Waxay ka mid ahaayeen tobanaan milyan oo qof oo shalay oo dhan safaf dhaadheer ugu jiray in ay codkooda ka dhiibtaan Maalinta Doorashada.
In ka badan 101 milyan oo qof ayaa toddobaadkyadii la soo dhaafay sii codeeyey, taasi oo qeyb ka ahayd in laga fogaado in dadku ay si fool ka fool ah u kulmaan maalinta Doorashada, xilli ay wali jiraan kiisaska cudurka COVID-19.
Tirinta hore ee codbixinta ayaa diiradda lagu saarayaa labada gobol ee badda Atlantic dhaca – Florida, oo ah gobol uu deegaan ka dhigtay Trump, iyo North Carolina.
Codadka la dhiibtay ee Doorashada Madaxtinimada dalka Mareykanka ayaa haatan waxaa ku horreeya Musharaxa Dimuqraadiga ahna Madaxweyne ku-xigeenkii hore ee Joe Biden, waxaana loo kala horreeyaa sida hoose ka muuqata.