Xildhibaa laga soo doorto Bariga Magaalada Mandheera, Cumar Maxamed Macallin, ayaa BBC-da u sheegay in ay dadka deegaankiisa ay cabsi soo foodsaartay, kaddib markii qeyb ka mid ah magaalada ay fariisimo ka dhigteen ciidammada wasiirka amniga ee Jubaland Cabdirashiid Xasan Cabdinuur (Janan).
Xildhibaan Cumar ayaa waxa uu dowladda Kenya ku eedeeyay inay fariisin siisay ciidammada Cabdirashiid Janan, arrintaas oo uu sheegay in ay halis gelinayso amniga deegaanka isaga laga soo doortay ee Bariga Mandheera, wuxuuna dalbaday in Wasiir Janan laga saaro Magaalada Mandheera.
“Haddii wadada aad marayso aad ku aragtid dad iyo baabuur hubaysan waa arrin xun, hase ahaatee meesha ma ahan Soomaaliya oo waa Kenya dhexdeeda, marka ciidan aan Kenyan ahayn oo waddankoodii ka soo carayay ayagoo qoryahoodii wata oo ay la yimaadaan Kenya wax adduunka ka dhaci kara ma ahan.” Ayuu yiri Xildhibaan Cumar.
Maalmihii ugu dambeeyay Magaalada Beled-Xaawo ee Gobolka Gedo ayaa waxaa ka taagan xiisad u dhexeeysa Ciidanka dowladda Federaalka iyo kuwa maamulka Jubbaland, waxaana daggaal halkaas ku dhexmaray labada dhinac ka dhashay Khasaaro isugu jira dhimasho iyo dhaawac.
Dhinaca kale inta badan dadkii ku sugnaa Degmada Beled-xaawo ayaa isaga barakacay gudaha degmadaas, iyagoona sheegay inay ka cabsi qabaan in dagaal uu dhexmaro Ciidanka dowladda iyo kuwa Jubbaland oo ku wada sugan gudaha degmadaas.