Wasiirka arrimaha dibadda ee Sucuudiga, Faysal Bin Farxaan, ayaa maanta oo Talaado ah iman doona magaalada Dimishiq, sida ay shaacisay wasaaradda warfaafinta ee dalka Suuriya.
Safarkan shaqo, ayaa ah kii ugu horreysay ee rasmi ah oo mas’uul Sucuudi ah ku tago dalka Suuriya, tan iyo markii ay labada waddan is khilaafeen, oo ay colaadda Suuriya ka billaabatay 12 sano ka hor.
Safarkan ayaa waxay soo gabagabaynaysaa kala go’naanshihii xiriirka diblomaasiyadeed ee dalalka Suuriya iyo Sacuudiga, waxayna ku soo beegantay maalmo ka dib safarkii wasiirka Arrimaha Dibadda Suuriya, Faysal Al-Miqdaad uu ku tagay magaalada Jeddah.
Waxay sidoo kale ku soo beegantay xilli dalalka Carabta ay ka wada hadlayaan suurta galnimada in dowladda Suuriya, ay dib ugu soo noqoto Ururka Jaamacadda Carabta.
