Warar dheeraad ah ayaa ka soo baxaya Qarax Miino nooca dhulka lagu aaso oo ka dhacay Magaalada Boosaaso ee Xarunta Gobolka Bari.
Dad goobjoogayaal ah oo la hadlay Warbaahinta ayaa sheegay in qaraxa lala eegtay Gaari nooca Soomaalida u taqaano Qooqan uu la socday Wasiirkii hore ee Qorsheynta dowlad Goboleedka Puntland Shire Xaaji Faarax xili uu marayay laamiga weyn ee bartamaha Boosaaso.
Ugu yaraan hal Askari oo ka tirsan ilaalada Wasiirkii hore ee Qorsheynta Puntland ayaa ku dhaawacmay qaraxa,kaasi oo saarnaa gaariga,mana jiro wax kale oo Khasaaraha uu geystay qaraxaas.
Wararka ayaa intaasi waxaa ay ku darayaan in gaariga xiliga uu qaraxa haleelay uu la socday Shire Xaaji Faarax,hayeeshee uu ka badbaaday qaraxaas.
Goobta uu falka ka dhacay ayaa waxaa gaaray Ciidamo ka tirsan kuwa amniga Magaalada Boosaaso,kuwaasi oo xiray markii horey Nawaaxiga Hotelkii hore ee Ramaada, balse markii dambe dib u furay.
Magaalada Boosaaso ee Xarunta Gobolka Bari ayaa xiliyada qaar waxaa ka dhaca qaraxyo kala duwan,kuwaasi oo sababa Khasaarooyin kale duwan,waxaana Mas’uuliyadooda inta badan sheegta Al-shabaab.
