Warar dheeraad ah ayaa kasoo baxaya dad shacab ah oo habeenkii xalay aheyd lagu dilay deegaan ka tirsan Gobolka Galgaduud, iyadoo dadii ka dambeeyay dilkaas ay ka baxsadeen sida aan wararka ku helnay.
Dilkaas ayaa waxaa uu sigaar ah uga dhacay inta u dhexeeysa deegaanada xananbuure iyo miir-jiiclay Gobolka Galgaduud, waxaana rag hubeysan ay toogteen laba ruux oo kamid ahaa dadka deegaanka.
Warar la helayo ayaa sheegaya in dilka loo geystay labadaas ruux oo rag ah uu yahay mid la xiriira aano qabiil oo in muddo ah lagu howlanaa sii loo xalin lahaa, hayeeshee lagu guul dareystay.
Ragii ka dambeeyay falka oo u abaabulnaa qaab qabiil ayaa goobta uu falku ka dhacay isaga tegay, waxaana qaar kamid dadka deegaanka xananbuure tageen halkaas, isla markaana qaaday Meydadka dadka la dilay.
Ciidanka Maamulka Galmudug ayaa wada howlgal baaritaano ah oo lagu doonayo in lagu soo qabtay dadkii geystay falkaas, welina ma jiro wax war ah oo kasoo baxay Maamulka oo ku aadan dhacdadaas dhacday.
Maalmo kahor ayay aheyd markii sidaan oo kale laba ruux loogu dilay magaalada Caabudwaaq ee Gobolka Galgaduud, xili uu falkaas la xiriiray aano qabiil, welina aan gacan lagu soo dhigin ragii ka dambeeyay, Galmudug ayaa sanadihii ugu dambeeyay waxaa kusoo badanayay dilalka iyo dagaal beeleedyada la xiriira qabaa’ilka.
