Midowga Musharixiinta oo ka hadlay Geerida Cali Mahdi Maxamed

Alle ha u naxariistee waxaa maqribnimadii Caawa Magaalada Nairobi ee Caasimadda dalka Kenya ku geeriyooday Madaxweynihii hore ee Soomaaliya Cali Mahdi Maxamed.

Madaxweynihii hore ee Soomaaliya Shariif Shiikh Axmed oo ah Guddoomiyaha  Midowga murashixiinta xilka Madaxweynaha ee Soomaaliya ayaa ka hadlay geerida ku timid Madaxweynihii hore ee Soomaaliya Cali Mahdi Maxamed.

Shiikh Shariif ayaa ka tacsiyeeyay geerida Marxuumka, waxaana uu xusay doorkii uu ka qaatay Dowladnimada Soomaaliya, waxaana sheegay in dalka uu usoo shaqeeyey xilli adag isagoo qayb ka qaatay shirar badan oo dib u heshiisiineed oo Soomaalida gudaha iyo banaankaba loogu qabtay.

“Waxaan murugada la qaybsanayaa guud ahaan shacbiga Soomaaliyeed anigoo uga tacsiyeynaya geerida Madaxweynihii hore Cali Mahdi Maxamed oo Nairobi ku geeriyoodey.Wuxuu dalka usoo shaqeeyey xilli adag isagoo qayb ka qaatay shirar badan oo dib u heshiisiineed oo Soomaalida gudaha iyo banaankaba loogu qabtay. Waxaan si gaar ah tacsi ugu dirayaa qoyskiisa iyo qaraabada, Allaha u naxariisto Samir iyo Iimaanna Allaha naga siiyo” ayuu yiri Shiikh Shariif Madaxweynihii hore ee Soomaaliya.

Dhanka kale Cabdiraxmaan Cabdi Shakuur Warsame ayaa dhankiisa ka tacsiyeeyay geerida ku timid Madaxweynihii hore ee Soomaaliya Cali Mahdi maxamed.

Qoraal uu soo dhigay bartiisa Facebook-ga ayuu ku yiri Cabdiraxmaan Cabdi Shakuur: “Waxaan tacsi u dirayaa ehelka, asxaabta iyo bulsho waynta Soomaaliyeed geerida naxtinta leh ee ku timid Madaxweynihii hore ee Soomaaliya, Mudane Cali Mahdi Maxamad. Allaha u naxariisto, sabar iyo iimaan Allaha ka siiyo qoyskiisa, asxaabta iyo ummada Soomaaliyeed intaba”.