Illhaan Cumar oo Eedeyn Culus u jeedisay Dowladda Itoobiya

Gabdhada Soomaaliyeed ee Illhaan Cumar ka tirsan Xildhibaanada Golaha Congress-ka dalka Mareykanka ayaa ka hadashay dagaal xoogan ee u dheexeya Ciidanka Itoobiya iyo kuwa Ismaamulka Gobolka Tigree-ga.

Illhaan Cumar ayaa dowladda Federaalka Itoobiya ee uu hoggaamiyo Ra’iisul Wasaare Abiy Axmed ku eedeeysay inay gashay nooc kasta oo dagaal ah, isla markaana la gashay Gobolka Tigree-ga oo kamid ah Gobolada dalkaas.

Sidoo kale Illhaan Cumar ayaa tilmaamay in Itoobiya ay duqeysay Magaalooyin ka tirsan Tigree-ga, sidoo kalena ay weerar khasaaro lilaax leh geystay ku qaaday Gobolkaas, sidoo kalena xirtay dad farabadan oo kasoo horjeeday.

“Dowladda Itoobiya waxay xirtay kuwii ka soo horjeeday, waxay ku hanjabtay duqayn, waxayna nooc kasta oo dagaal ah la gashay mid kamid ah gobolladeeda gaar ahaan Tigray”. Ayay tiri Xildhibaanad Illhaan Cumar.

Dagaalka u dhexeeya Ciidanka Milateriga dowladda Federaalka Itoobiya iyo Ismaamulka Gobolka Tigree-ga ayaa galay todobaadkii labaad oo xiriir ah, isla  markaana ciidanka Milateriga ayaa qabsaday Magaalooyin muhiim u ah TPLF.