Dowladda Federaalka oo sheegtay inuu socdo qorshe lagula dagaalamayo Musuqa

Guddoomiyaha Guddiga madaxa banaan ee la dagaalanka Musuq-maasuqa Abuukaate Maxamed Xuseen Xaamud ayaa maanta ka warbixiyay kulan ku aadan la dagaalanka musuqa oo uu uga qeybgalay Dalka Masar iyo sida dowladda iyo shacabka Soomaaliya ay uga qeyb qaadan karaan xalka arrintaasi.

Guddoomiyaha oo ka qeybgalay barnaamij ka baxayey SNTV ayaa xusay in dhowaan ay dalka Masar kaga qeybgaleen shir ku saabsaanaa la dagaalanka musuqa oo ay ka qeybgaleen dalal ka mid ah caalamka.

Abuukaate Maxamed Xuseen Xaamud ayaa sheegay in ujeedada shirkaasi uu ahaa sidii dalalka dunida ay isu dhaafsan lahaayeen aqoon iyo khibrad ku aadan la dagaalanka musuqa,,wuxuuna intaa ku daray in halkaasi ay ka soo baxeen fursado wanaagsan oo wax looga qaban karo musuqa.

Guddoomiyuhu, waxa uu qiray in ay jiraan qorshe kutalagal oo la doonayo in lagula dagaalamo musuqa ,gaar ahaan mudada u dhaxeysa 2021- 2023-ka, isagoo intaa raaciya in ciribtirka musuqa uu yahay mid u baahan xal waafi ah oo ay ka qeybgalaan dowladda Federaalka iyo guud ahaan qeybaha bulshada ee dalka.

Guddoomiyaha Guddiga madaxa banaan ee la dagaalanka Musuq-maasuqa Abuukaate Maxamed Xuseen Xaamud, waxa uu xusay in marka la helo iskaashi u dhaxeeya hey’adaha ammaanka,kuwa garsoorka iyo warbaahinta la gaari karo xal ku yimaada ilaalinta maaliyadda dalka iyo guud ahaan adeegyada umadda.