Gaalkacayo: Galbis Aroos oo lagu dilay Caruuskii Reerka Cusub,

Sida uu ku soo waramay Weriyeheenna Radio Dalsan ee magaalladda Gaalkacayo, Xuseen Xaddaari, waxaa xalay Waqooyiga Gaalkacayo ka dhacday fal tiiraanyo xambaarsan.

Abaarihii 10:30 fiidnimo ayaa waxa uu nin hubeysan rasaas la dhacay Caruus isku diyaarinayey in loo gelbiyo Xaaska uu Dunida ka soo calmaday, waxaana halkaasi ku geeriyooday Marxuumkii Arooska ahaa.

Wiil ay ehel hoose yihiin ayaa la sheegay inuu dilku geystay oo uu shan xabbadood ku dhuftay Marxuumka oo xilligaasi ku jiray Farxadda Gelbiskiisa.

Dadkii ku sugnaa Xafladda ayaa wada dareemay Naxdin iyo Fajac, waxayna qaadan kari waayeen Falkaas murugadda leh, iyadoo uu shaki weyn ka jiro sababta dilka loogu soo beegay Xafladda Gelbinta.

Ma cadda sababaha rasmiga ee loo dilay Caruuska, inkastoo ay dadka hadal-hayaan inuu khilaaf ka dhex jiray Reerkooda.

Boliska Puntland ayaa soo gaaray goobta uu dilku ka dhacay, waxaana weli socda baaritaanka lagu ogaanayo waxa dhaliyey dilkaasi.

© Radio Dalsan