Wasiirka Caafimaadka Xukuumadda Federaalka Soomaaliya ee xilgaarsiinta Fowsiya Abiikar Nuur ayaa Maanta Xafiiska Wasaaradda Caafimaadka kulan kula qaadatay wafdi ka socday Ururka Caafimaadka Aduunka (WHO) ee EMRO oo soo gaaray Magaalada Muqdisho.
Wasiir Fowsiya Abiikar ayaa wafdiga WHO ee yimid Caasimadda uga warbixisay xaaladihii ugu dambeeyay ee Cudurka halista ah ee COVID-19 ee dalka iyo sidii dowladda Federaalka looga taageeri lahaa la dagaalanka faafaha COVID-19.
Wasiirka Caafimaadka Xukuumadda Federaalka Soomaaliya ee xilgaarsiinta Fowsiya Abiikar Nuur ayaa Ururka Caafimaadka Aduunka (WHO) ee EMRO uga mahadcelisay taageerada ay la garab taagan yihiin dowladda Soomaaliya.
Booqashadan wafdigaan Maanta soo gaaray Muqdisho ayaa hordhac u ah bilowga shaqo 6 maalmood ah oo dib loogu qiimeynayo sidii looga jawaabay caabuqa COVID-19 iyo sida ugu haboon ee loo sii xoojin karo dadaallada ka dhanka ah COVID-19.
Tirada xaaladaha COVID-19 ee dalka laga diiwaan geliyay ayaa gaartay 19,723 qof, isla markaana bogsootay 9,414 Ruux. guud ahaan 1,103 ruux oo kale ayaa u geeriyootay, sida lagu shaaciyay Warbixinta maalinlaha ee Wasaaradda Caafimaadka Xukuumadda.
