Dowladda Turkiga ayaa si kulul u Cambaareeysay weerarkii Qaraxa ku bilowday ee gelinkii dambe ee shalay lagu qaaday Hotelka Elite ee ku yaalla xeebta Liido ee Degmada Cabdicaiis ee Gobolka Banaadir.
Qoraal kasoo baxay Wasaaradda Arrimada Dibadda Turkiga ayaa waxaa lagu sheegay in aad uga xun yihiin weerarkii lagu qaaday Hotelka, isla markaana waxaa ay tacsi u dirtay dadkii Ehelada dadkii ku geeriyooday weerarkaas.
“Waxaa aad uga xun-nahay weerarkii 5-ta saacadood qaatay ee lala beegsaday Hotelka Elite ee Magaalada Muqdisho, falkaas waxaa uu ahaa mid argagax leh” ayaa lagu yiri Qoraalka Wasaaradda Arrimada Dibadda.
Sidoo kale Turkiga ayaa tacsi tiiraanyo leh u diray ehelada dadkii shacabka ahaa ee ku geeriyooday weerarkii Hotelka, iyagoo kuwa ku dhaawacmay ay u rajeeyeen Caafimaad Deg-deg ah.
Ugu yaraan 16 qof ayaa ku geeriyooday weerarkii Al-shabaab ay ku qaadeen Hotelka Elite ee ku yaalla xeebta Liido, isla markaana waxaa ku dhaawacmay 13 qof, kuwaasi oo la dhigay Xarumaha Caafimaadka, iyadoona laga soo badbaadiyay 300 qof.
Al-shabaab ayaa warar ay ku qoreen barahooda dhinaca Internet-ka ayaa waxaa ay ku sheeteen Mas’uuliyada weerarka lagu qaaday Hotelka Elite, waxaana rag hubeysan oo ka tirsan iyaga ay ka dhex-dagaalamayeen gudaha hotelka saacado dhowr ah.