Taliyaha Ciidanka xoogga dalka Jeneraal Odawaa Yuusuf Raage oo uu wehliyo Wasiir ku-xigeenka Wasaaradda Gaashaandhigga Xukuumadda Xildhibaan Cabdifitaax Qaasim ayaa gaaray deegaanka Masaajid Cali Guduud ee gobolka Shabeellada Dhexe.
Socdaalka mas’uuliyiinta ayaa daaran dardar galinta howlgalka xoreynta deegaanada Al-shabaab kaga sugan tahay deegaano kamid ah Shabeellaha Dhexe, waxaana deegaankaas ka socda dhaqdhaqaaq xoog leh.
Taliye Odawaa ayaa haatan waxaa uu kulamo la leeyahay Saraakiisha hoggaamineysa Ciidamada dowladda Federaalka iyo kuwa deegaanka ee macwiisleyda ah, isagoona hadlaya howlgalada ka socda Gobolka iyo sidii loo dardar-gelin ahaa howlgaladaas.
Ciidamada dowladda iyo kuwa macwiisleyda ah ayaa maalmo kahor qabsaday deegaanka Masaajid Cali Guduud, halkaas oo Al-shabaab in muddo ah ay ku sugnaayeen, iyadoo deegaankana ay isaga barakaceen dadkii deegaanka ee joogay.
Degaanka Masaajid Cali Gaduud ayaa ahaa goob muhiim ah oo Al-shabaab ay ka difaacaan Xaruntooda weyn ee degmada Aadan-yabaal, iskuna xirta gobollada Shabeellaha Dhexe iyo Galgaduud.
