Boliska dalka Faransiiska ayaa sheegay inay daraasiin Tahriibayaal Afrikaan ah oo loo diiday inay ka soo gudbaan xuduudka Talyaaniga ku dhaqaaqeen inaysan cuntadda cunin.
Tahriibayaashaasi oo ku sugan Degmadda Ventimiglia ee xuduudka Talyaaniga la wadaago Faransiiska, ayaa la sheegay inay shalay bilaabeen cunto-ka-soomidda, waxayna ku goodiyeen inay hor joogsan doonaan gaadiidka isaga kala goosha dalalka Talyaaniga iyo Faransiiska.
Tahriibayaasha waxay wataan Booraray ku qoran yihiin erayo ay ka mid yihiin: “Ma doonayno inaan dib u laabano, waxaan doonaynaa inaan sii gudubno, waxaan u baahanahay Xornimo”.
Tahriibayaasha ku dhaqaaqay gadoodkaasi ayaa ka soo kala jeeda Somalia, Eritrea, Sudan iyo Ivory Coast, waxayna badankooda doonayaan inay u sii gudbaan dalalka Jarmalka, Britain iyo Sweden, si ay uga helaan magangelyo qaxootinimo.
Shaqaale ka tirsan Hay’adda Bisha Cas ayaa la sheegay inay cunto iyo biyo u qeybiyeen haweenka iyo carruurta ka mid ah Tahriibayaasha ku xaniban xuduudka Talyaaniga iyo Faransiiska.
Ragga Tahriibayaasha ee cabashadda muujinayo waxay dhamaantooda diideen inay wax cunaan ama cabaan.
Duqa magaalladda Ventimiglia, Ernico Loculano ayaa u sheegay Telefishinka SKY TG 24 inay qaar ka mid ah Tahriibayaasha u muuqdaan kuwa goor ay ahaataba Tareen ku geli doona dalka Faransiiska.
Dhinaca kale, Boliska Faransiiska waxay u sheegeen Wakaalladda Wararka ee AFP in amar lagu siiyey inaysan Tahriibayaashaasi u soo gudbi karin Faransiiska.
© Warqabadka Dalsan Radio
