Guddoomiyihii hore ee Gobolka Banaadir ahna Duqii Muqdisho Taabid Cabdi Maxamed ayaa si kulul uga hadlay fal kufsi ah oo Gabar dhalinyaro ah loogu geystay Muqdisho, kadibna la dilay oo laga soo tuuray dabaq dheer oo ku yaalla Degmada Waaberi ee Gobolka.
Qoraal uu soo saaray Taabid Cabdi ayaa waxaa uu ku sheegay inuu aad uga xun yahay falkaas loo geystay Marxuumad lagu magacaabi jiray Xamdi Maxamed Faarax, isagoo xusay in xanuunka iyo murugada uu la qeybsanayo qoyska iyo ehelada marxuumada.
Guddoomiyihii hore ee Gobolka Banaadir Taabid ayaa ku baaqay in aan laga daahin sidii caddaaladda loo horgeyn lahaa ragii ka dambeeyay falkii foosha xumaa, isla markaana si deg deg loo marsiyaa ciqaabtooda, waliba ummadda marqaati looga dhigo.
Hoos ka Akhriso Qoraalka uu soo saaray Taabid Cabdi.
Marka hore waxaan xanuunka iyo murugada la qeybsanayaa qoyska iyo ehelada marxuumad Xamdi Maxamed Faarax oo arxan-laawayaal aan diir-naxa laheyn kufsadeen, kadibna nafta dhaafiyeen.
Walaal Xamdi, Allaha u raxmado. Silica ay aduunyada ugu geysteen, jizadeeda wey helayaan InshaAllah. Caddaaladda Eebe marnaba ma baaqato. Manaxayaashuna adduunyadu waa ku ciriiri, aakhirana waa xisaabtii Alle oo aan laga baxsan karin.
Waa dulmi aad u fool xun. Waxaan ku baaqeynaa inaan la daahin sidii caddaaladda loo horgeyn lahaa manaxayaashii dhibkan geystay iyo in deg deg loo marsiyaa ciqaabtooda, waliba ummadda oo marqaati ah.
Waxaan culimada iyo bulshada qeybaheeda kala duwan ugu waceynaa in loo istaago sidii ficilladan argagaxa leh ee soo noq-noqday loo suulin lahaa, wacyigelin balaaranna loo sameyn lahaa. Diinteena suuban iyo dhaqankeena wanaagsan meelna kama soo galaan ficillada noocaan ah.
