Guddiga sare ee SSC-Khaatumo oo war ka soo saaray dagaala bariga iyo galbeedka Laascaanood ayaa sheegay in barqanimadii maanta Ciidamada Somaliland ay labo weerar ku soo qaadeen deegaanka Dhabansaar ee duleedka Tuulo-Samakaab iyo bariga magaalada Laascaanood.
War-saxaafadeed kasoo baxay SSC Khaatumo ayaa sidoo kale lagu sheegay in Ciidamada Somaliland ay jab iyo iskacaabin xoogga kala kulmeen kuwa SSC Khaatumo,waa sida ay hadalka u dhigeene.
Waxaa barqanimadii maanta Ciidamada malayshiyada Somaliland ay labo weerar ku soo qaadeen deegaanka Dhabansaar ee duleedka Tuulo-Samakaab iyo bariga magaalada Laascaanood, iyaga oo dharbaaxo iskacaabbin ah oo kulul kala kulmay Ciidamada xaq-u-dirirka ah ee difaaca shacabka SSC” ayaa lagu yiri War-saxaafadeed uu soo saaray Afhayeenka SSC-Khaatumo Caaqil Cabdirisaaq Falaalug.
Sidoo kale waxaa ay sheegeen SSC Khaatumo in Somaliland ay aruurinayeen ciidamo qorshohoodu ahaa in ay kaga dabotagaan shacabkii hore uga qaxay madaafiicda ay ku garaacayaan magaalada Laascaanood, iyada oo uu dagaalka ay isku difaacayaan shacabka deegaanku uu weli ka socdo duleedka Samakaab.
Dhinaca duleedka bariga Laascaanood ayaa waxaa ka socda dagaal ka dib markii ay weerar soo qaadeen Somaliland, ciidamada shacabka deegaanka ayaa weerarka iskacaabbiyey welina dagaal qaraar ayaa aagaa ka socda.
