Somaliland oo Maanta shaacisay in lagu leeyahay Lacag Deyn ah oo dhan 45 Milyan

Wasiirka Wasaaradda Maaliyada Somaliland Sacad Cali Shire ayaa Maanta ku dhawaaqay in Maamulka Somaliland lagu leeyahay lacag deyn ah oo dhan ah $45 milyan oo dollar, kadib shir jaraa’id uu ku qabtay magaalada Hargeysa.

Wasiir Sacad Shire ayaa waxaa uu sheegay in lacagta deynta ee lagu leeyahay Somaliland ay gaareyso $45 milyan, isla markaana lacagtaas ay ku baxday kaabayaal, mashaariic horumarineed iyo arrimo la xiriira amniga iyo saanado Ciidan.

Wuxuu hadalkiisa intaas kusii daray Wasiirka Maaliyada in xogta deynta lagu leeyahay ay tahay mid keydsan oo ay u qorsheysan tahay in mid kastaba xiligeeda la bixiyo, isagoona xusay in Xukuumada Muuse Biixi Cabdi ay deynta kala soo wareegtay Xukuumadihii ka horeeyay.

“Daynta 45 milyan ee aan sheegay %56 waxaynu kala soo wareegnay dowladihii hore, dowladanba maaha, intii hore iyo intanba markaad eegto runtii meesha lacagtu ku baxday waa kaabayaal, waliba kaabayaashii aynu dib u qaramaynay ayaa %40 ka ah, %49 waxa ka ah wax la xiriira amniga ama saanad ciidan” ayuu yiri Wasiirka.

Gaba-gabadii Wasiirka Maaliyada Somaliland Sacad Cali Shire Wasiirka ayaa tilmaamay in ay wax caadiyada tahay in dowladuhu deynta qaataan, isaga oo sheegay in Jabuuti 1 bilyan oo dollar oo deyn ah lagu leeyahay, halka Kenya-na 70 bilyan lagu leeyahay, waxa uu sheegay in dhamaan lacagtan lagu maalgaliyay wax loo baahnaa.

About Webmaster

View all posts by Webmaster