Shirka Golaha Wadatashiga Qaran oo Maalintii labaad ka socda Magaalada Baydhabo

Waxaa maalintii labaad magaalada Baydhabo ka socda Shirka Golaha Wadatashiga Qaran ee dowladda Federaalka iyo dowladaha xubnaha ka ah iyo Gobolka Banaadir oo shalay ka furmay Magaalada Baydhabo ee Xarunta Gobolka Baay.

Shirkaan Golaha oo uu shir guddoominayo Madaxweyne Xasan Sheekh Maxamuud ayaa waxaa looga arinsanayaa qaab dhismeedka amniga qaranka, hannaanka federaaleynta maaliyadda, doorashooyinka heer federaal iyo heer dowlad Goboleed.

Shirka ayaa waxaa ka qeyb galaya Ra’iisul Wasaare Xamse Cabdi Barre, Ra’iisul Wasaare ku-xigeenka Xukuumadda Salah Jama iyo Madaxweynayaasha maamulada Koonfur-Galbeed, Hirshabeelle, Jubbaland, Galmudug iyo Guddoomiyaha Gobolka Banaadir ahna Duqa Muqdisho, waxaana ka maqan oo kaliya Madaxweynaha Puntland Saciid Cabdullaahi Deni.

Ammaanka guud ee magaalada Baydhabo ee caasimadda KMG ah ee Koonfur Galbeed ayaa maanta aad loo adkeeyay, waxaana la xiray dhammaan waddooyinka soo gala iyo kuwa kabaxa Xarunta Madaxtooyada oo uu shirka Golaha ka socdo.

About Dalsan Editor

View all posts by Dalsan Editor