Allaha u naxariistee Galabta Qabuuraha Iskuul Bulusiya ee Magaalada Muqdisho waxaa lagu aasay qaar ka mid ahaa Ciidamadii ku geeriyooday qarixii Ismiidaaminta ahaa ee saakay ka dhacay Xarunta tababarka ciidanka ee Jenaral Kaahiye.
Aaska ayaa waxaa ka qeyb galay Ku simaha taliyaha Ciidanka Booliiska Soomaaliya ahna taliye ku xigeenka ciidanka Jenaraal Muqtaar Xuseen Afrax iyo sidoo kale Gudoomiyaha Gobolka Banaadir ahna duqa Muqdisho Taabit Cabdi Maxamed.
Dhamaan madaxdii ka qeyb gashay aaska ayaa u duceeyay Askartii ku geeriyootay qaraxaasi ismiidaaminta ah iyaga oo sheegay in ay ahaayeen kuwo shahiiday.
Askartaan ayaa ka mid ahaa Ciidamadii ka tirsanaa kuwa Booliiska ee saakay aroortii ku geeriyooday Barxada Dugsiga tababarka ee Jenaral Kaahiye kadib markii ruux waxyaabaha qarxa isku soo xiray uu isku qarxiyay.
