Boliska Turkiga ayaa gacanta ku haya Ninkii hubeysnaa ee bilowgii bishan January weerarka ka geystay dhismo lagu caweeyo oo ku yaalla Istanbul oo uu ku dilay 39-qof oo ay Ajaaniib ku jirtay.
Ninkaasi oo lagu magacaabo C/qaadir Masharipov waxaa xalay laga soo qabtay Dhismo ku yaalla Degmadda Esenyurt ee duleedka Galbeed magaalladda Istanbul, isla markaana ku-dhawaad 30-KM u jirta Dhismaha Caweyska ee toogashadda ka geystay oo lagu magacaabo The Reina nightclub.
Eedeysanaha oo ka soo jeeda dalka Usbakistan waxa uu  dhashay sannadkii 1983-kii, wuxuuna Tababar Milliteri ku soo qaatay dalka Afganistan.
Eedeysanaha oo ay Dembi-baarayaasha Boliska Turkiga su’aalo ku weydiiyeen Xarunta Boliska Istanbul ayaa qirtay inuu isagu yahay Shaqsigii toogtay dadkii u dabaal-degayey sannadka cusub.
Waxaa lala soo qabtay wiil yar oo uu dhalay, Nin u dhashay Iraq iyo saddex haween oo u kala dhashay Somalia, Masar iyo Senegal.
Guddoomiyaha Istanbul, Vasip Sahin ayaa sheegay in Hawlgalkaasi lagu soo qabtay 2 Bistoolad, SIM Cards-ka Mobaylada iyo lacag dhan 197,000 oo Dollar.
Guddoomiyaha Istanbal waxa uu tilmaamay in sawirka faraha laga qaaday Eedeysanaha la mid yihiin kuwii ay Dembi-baarayaasha ka qaadeen goobta ay Toogashadda ka dhacday bishan 1-dii.
“Waxay u muuqataa in C/qaadir Masharipov iyo kuwa kale ee lala qabtay u soo wareegeen Dhismaha ku yaalla Deegaanka Esenyurt saddex maalmood ka hor†ayuu yiri Guddoomiyaha Istanbul.
Waxa uu intaasi ku daray in 5 Cinwaano Guri lagu hayey dabagal, kuwaasi oo lagu qaaday Hawlgal, waxaana Eedeysanaha laga helay mid ka mid ah Dhismayaasha la hayey Cinwaankooda.
Eedeysanaha C/qaadir Masharipov waxa uu markii ugu horreysay kireysstay Dhismo ku yaalla Deegaanka Basaksehir ee duleedka magaalladda Istanbul, ka hor inta uusan daminin Cinwaanada hal maalin ama labo maalin ka hor weerarkii uu ka geystay Naadiga lagu caweeyo.
Baarayaasha Dembiyadda Turkiga waxay dib-u-eegis qaadatay 7,200 saacadood ku sameeyeen Muuqaalada ay duubeen Kamerooyinka Qarsoon, iyadoo ay Boliska heleen in ka badan 2,000 oo far-muuqis ku aadan Eedeysanaha sida xooggan loo raadinayey.
Dhinaca kale, Ku-xigeenka Ra’isul-wasaaraha Turkiga, ahna Afhayeenka Dowladda, Numcaan Kurtulmus ayaa u hambalyeeyey Boliska gacanta ku soo dhigay Eedeysanaha geystay weerarka.
Caddaymo xooggan ayaa sheegayo inuu Eedeysanaha si sharci-darro ah Turkiga kaga soo galay Xuduudaha Bariga bishii January ee dannadkii hore, waxaana iska cad inuu weerarkaasi u geystay isagoo ka amar qaadanayey Kooxda Daacish.
©Radio Dalsan
