Dowladda Ethiopia ayaa oggolaatay codsi uu Madaxweynaha Maamulka Puntland, C/weli Maxamed Cali Gaas kaga dalbaday in Maamulkiisa laga taageero La-dagaalanka Alshabaab iyo in dadkii ku dhaawacmay Qaraxyadii dhawaan ka dhacay Waqooyiga Gaalkacayo lagu daaweeyo Isbitaalladda Ethiopia.
Madaxweyne Gaas oo maalmahan Booqasho ku joogay magaalladda Addis Abeba waxa uu Kulan la qaatay Wasiirka Difaaca Ethiopia, Siraajo Fergessa.
Labada Mas’uul waxay ka wada hadleen Xaalladda Ammaanka Puntland, Iskaashiga La-dagaalanka Alshabaab iyo sidii ay Saraakiisha Ethiopia u tababari lahaayeen Ciiddanka Puntland.
Dhinaca kale, Madaxweynaha Puntland waxa uu magaalladda Addis Abeba kula kulmay Ganacsato u dhalatay dalka Shiinaha iyo kuwa Afrikaan, isagoo ugu baaqay inay Maalgashi ku sameeyaan Puntland.
Madaxweyne Gaas waxa kale oo uu la kulmay dhigiisa Dowlad-gobaleedka Soomaalida Ethiopia, Abdi Mohamoud Omar iyo Madax kale oo ay isla eegeen Iskaashiga labada dhinac iyo Qoraal Qabyo oo la xiriira Ganacsiga iyo Canshuuraha ee Puntland iyo Ethiopia.
Si kastaba ha haatee, booqashadda uu C/weli Gaas ku tegay Ethiopia ayaa ku soo beegantay, kadib, markii ay Alshabaab falal Is-miidaamin ah ka geysteen Waqooyiga Gaalkacayo, laguna dilay in ka badan 30 qof.
©Radio Dalsan
