Qaramada Midoobay ayaa Cambaareysay weerarkii shalay oo talaado aheyd Al-shabaab ku qaadeen Saldhig Ciidanka Midowga Afrika gaar ahaan kuwa Burundi ee ka tirsan howlgalka ATMIS ay ku leeyihiin deegaanka Ceelbaraf ee Gobolka Shabeellaha Dhexe.
Qoraal kasoo baxay Xafiiska UN-ka ee Magaalada Muqdisho ayaa waxaa tacsi loogu diray dadkii ku dhintay weerarkii ka dhacay deegaanka Ceelbaraf, iyagoona Caafimaad Deg-deg ah u rajeeyay dadka waxyeelada dhaawaca ah kasoo gaaray weerarkaasi.
Xafiiska Qaramada Midoobay ee Soomaaliya ayaa sheegay inay si adeg u garab taagan yihiin howlgalka Midowga Afrika ee ATMIS iyo Ciidamada ammaanka dowladda Federaalka Soomaaliya dadaallada ay ku hagaajinayaan amniga dalka Soomaaliya.
“Qaramada Midoobay waxa ay cambaareyneysaa weerarkii shalay Al-Shabaab ay ku qaadeen saldhigga Hawlgalka Kalaguurka Midowga Afrika ee Soomaaliya (ATMIS) ee ciidamada nabad ilaalinta Burundi. Qaramada Midoobay ayaa tacsi u dirtay dadkii ku dhintay weerarkaa, waxayna u rajeyneysaa caafimaad degdeg ah kuwa dhaawacmay. Waxay si adag u garab taagan tahay ATMIS iyo ciidamada ammaanka Soomaaliya dadaallada ay ku hagaajinayaan amniga Soomaaliya†ayaa lagu yiri Qoraalka UN-ka.
Midowga Afrika, Dowladda Federaalka Soomaaliya iyo Turkiga ayaa hore u Cambaareeyay weerarkii khasaaraha badan dhaliyey ee shalay Al-shabaab ku qaadeen Saldhig Ciidanka Burundi ay ku leeyihiin deegaanka Ceelbaraf ee Shabeellaha Dhexe.
Al-shabaab ayaa shaacisay in weerarka oo ku bilowday qaraxyo Is-miidaamin ah ay Ciidanka Burundi uga dileen ugu yaraan 173 Askari, halka tobanaan kalena Askar ay dhaawacyo gaarsiiyeen, waxaana markii dambe halkaas isaga baxay Ciidanka ATMIS.
