Dowlad Goboleedka Puntland ayaa war kasoo saartay tallaabadii dowladda Federaalka Soomaaliya ku shaacisay inay ku xireyso Xarunta Qunsuliyadda Itoobiya ku leedahay gudaha magaalada Garoowe ee Xarunta Gobolka Nugaal ahna caasimadda Puntland.
War-saxaafadeed xalay kasoo baxay Madaxtooyada Puntland ayaa waxaa lagu sheegay marka hore in Maamulkooda iyo dowladda Federaalka iyo Itoobiya uu ka dhexeeyo xiriiro soo jireen ah, oo dhowr qodob ku saleysan sida iskaashiga, dhaqaalaha iyo amniga.
Puntland ayaa ku eedeysay dowladda Federaalka inay laashay Dastuurkii xaqiijinayey isku-haynta ummada iyo dowlad-dhiska Soomaaliya, iyagoona Go’aanka shalay ay gaareen Golaha Wasiirada ee lagu xiray Qunsuliyadda Itoobiya ee Garoowe ku tilmaamay in uusan aheyd mid loogu daneynayay maslaxada ummada Soomaaliyeed.
Sidoo kale Puntland ayaa caddeeysay inay danaheeda kala macaamilayso wadamada deriska ah, beesha caalamka iyo dhamaan daneeyeyaasha arrimaha Soomaaliya, islamarkasna go’aanka xiritaanka Qusuliyada Garowe aanu khusayn Puntland.
Qaraar shalay kasoo baxay Golaha Wasiirada Soomaaliya ayaa lagu xiray qunsuliyadaha ay Dowladda Itoobiya ku lahayd magaalooyinka Garoowe iyo Hargeysa, kadib markii dorraad ay Itoobiya shaacisay inay heshiis iskaashi la galeen Maamulka Puntland.
