Kadib markii Al-shabaab ay sheegeen inay la wareegeen deegaano dhowr ah oo ka tirsan Gobolka Sanaag ayaa waxaa Warkaas ka hadashay dowlad Goboleedka Puntland ee uu hoggaamiyo Madaxweyne Deni.
Taliyaha Ciidanka Puntland ee Gobolka Sanaag General Cabdullaahi Cumar Canshuur oo la hadlay BBC-da ayaa u sheegay in Al-shabaab aysan si toos ah ula wareegin deegaano ka tirsan Gobolkaas, hayeeshee si qarsoodi ah ku joogaan Gobolka.
Waxaa uu sheegay Taliyaha Cabdullaahi Cabshuur in haatan aysan jirin meel ka tirsan Sanaag oo fariisimo ay ku leeyihiin Al-shabaab, isagoona beeniyay wararka ay faafiyeen Al-shabaab, waana sida uu hadalka u dhigay.
Shacabka kunool deegaanada Puntland ay gacanta ku heyso ee Sanaag ayuu Taliyaja Ciidanka ka dalbaday la shaqeynta Ciidanka Maamulka, wuxuuna sheegay inay Shabaab la geli doonaan dagaal adeg.
War qoraal ah oo Al-shabaab barahooda dhinaca Internet-ka ku qoreen ayaa waxaa ay ku sheegeen inay la wareegeen gacanta ku heynta deegaanada kala ah Mirici, Masha-caleed, Xabaasha Aw-Cali iyo Markeet, kuwaasi oo dhammaantood ku yaalla duleedyada degmada Laasqoray ee Sanaag.
Sidoo kale Shabaabka ayaa sheegtay inay la kulmeen Waxgarad ku sugnaa deegaanada ay qabsadeen, isla markaana muxaadarro u soo jeediyeen dadka oo ay isugu geeyen goob fagaare ah oo ku taalla halkaas, sidoo kalena gacanta ay ku dhigeen gaari siday Khamri.
