Sheekh Hassan Mahad Omar oo haatan u xiran Ciiddanka Boliska ugu qaabilsan La-dagaalanka waxa loogu yeero Kooxaha Argagixisadda ayaa lagu sii daayey damiin, kadib, markii ay Maxkamadda Milimani Law Courts ee magaalladda Nairobi ku gacan saytay codsi uu Madaxa Baarayaasha Dowladda ku doonayey in ninkaasi lagu sii hayo gacanta Boliska.
Garsooradda Sare ee Maxkamadda Milimani Law Courts, Grace Mumasi ayaa xukumisay in Eedeysanaha lagu sii daayo lacag dhan 2 million oo Kenya Shillings ah iyo inuu toddobaadkiiba hal mar iska xaadiriyo Waaxda Boliska Kenya ugu qaabilsan La-dagaalanka Argagixisadda ee ATPI.
Eedeysanaha waxaa kaloo lagu soo oogay inuu maalgeliyey weerarkii Alshabaab bishii April 2-dii ka geysteen Jamaacadda Garissa, laguna dilay 148 qof oo u badnaa Ardaydii dhiganaysay Jaamacadda.
Dhinaca kale, Kiiska loo haysto Eedeysanaha ayaa la filayaa in mar kale la dhegeysto bisha July 30-da iyo 31-da.
