Muuqaal Video ah oo ay dhawaan Kooxda Daacish soo bandhigtay ayaa waxaa ka muuqday Dagaalyahanno Somali ah oo ka tirsan Daacish, kuwaasi oo sheegay inay ku casuumayaan Dagaalyahannadda Soomaalida inay ku soo biiraan halganka Dagaal ee Daacish.
Muuqaalkaasi oo muddo 6 daqiiqo soconayo ayaa waxaa ka soo muuqday 5 dagagaalyahano Somali oo ku hadlayey Luqadda Carabiga, waxayna sheegeen inay Alshabaab yihiin Mujaahidiin dhab ah, loona baahan yahay inay ku soo biiraan Halganka Dagaal ee lagala soo horjeedo Reer Galbeedka.
Dagaalyahannadda baaqa jeediyey ayaa hoos fadhiyey geed Timir, iyadoo ay ku hareersanaayeen Dagaalyahanno aad u hubeysnaa.
Waa markii ugu horreysay oo ay Kooxda Dagaalyahannadda Islaamiga ee Daacish si toos ah u soo bandhigaan Muuqaal Video oo ay Xarakadda Alshabaab si toos ah ugu baaqeen inay ku soo biiraan Kooxda Daacish.
Alshabaab oo Isbahaysi la noqotay Ururka Alqaacida sannaadkii 2012-kii ayaan weli ka hadlin dalabka Kooxda Daacish, waxaana warar horey u soo baxay ay sheegeen inay Hoggaamiyayaasha Xarakadda Alshabaab ku kala qeybsan yihiin ku-biirida Daacish.
Dhinaca kale, Dagaalyahannadda Boko Haram ee dalka Nigeria ayaa horey u shaaciyey inay ku biireen Kooxda Daacish oo isku magacowda Dowladda Islaamka (Islamic State).
