Warar ay heshay Idaacadda Dalsan ee Magaalada Muqdisho ayaa sheegaya in ciidanka Nabad sugidda iyo sirdoonka Soomaaliya ay Garoonka diyaaradaha Aadan-Cadde ay ku qabteen nin ajnabi ah oo la sheegay in uu qorsheynayay in uu ka duulo garoonka laakiin laga shakiyay boorsooyin waaweyn uu watay.
Ilo wareedyada la hadlay Dalsan oo codsaday in la qariyo magacyadooda ayaa xaqiijiyay duhurnimadii maanta in ciidanka booliisku ay joojiyeen ninkaan ajnabiga ah kaas oo watay seddex shandad,waxaana ay sheegeen in lagu joojiyay qeybta baarista kadibna ay goobta soo gaareen ciidan khaas ah oo ka mid ah kuwa miina baarista iyo qeyb kale oo ka tirsan sirdoonka Soomaaliya.
Intii ay socotay baarista ayaa la sheegay in boorsooyinkiisa laga helay Sunta dadka ka ilmeeysiisa,waxaana lagu wareejiyay ciidanka Nabad sugidda oo wada baarista la xiriirta ninkaas iyo waxa uu ka damacsanaa Suntaas uu ku weday boorsooyinka.
Dhinaca kalana waxaa la sheegay in ruuxaan ajnabiga ah ee lagu qabtay Garoonka in uu mar la shaqeyn jiray Shirkadda SKA,oo maamusha Garoonka,Xiriiro aan la sameeynay qaar ka mid ah hey’adaha ku shaqada leh ayaa waxa ay sheegeen in ay jirto qabashada ruuxaan laakiin ay socdaan baaritaano,iyaga oo Dalsan u xaqiijiyay in ay la xiriireen Shirkadda lagu eedeynayo in uu la shaqeynayay hase,ahaatee ay iska dafireen in uu wax lug ah ku leeyahay,iyada oo ilaa iyo hadda aan la shaacin dhalashadiisa.
Ilaa iyo hadda Hay’adaha Amniga Soomaaliya wax war ah kama soo saarin Ninkan Ajnabiga ee watay Sunta dadka ilmeysiisa oo Maanta lagu qabtay Garoonka Diyaaradaha Aadan-Cadde ee Magalada muqdisho.
Xuquuqdu way dhowr santahay.
