Madaxweynaha dowlad Goboleedka Jubaland Axmed Maxamed Islaam Axmed Madoobe ayaa ka hadlay sababta uu weli u soo magacaabi la’yahay Golihiisa Wasiirada tan iyo markii dib loo doortay.
Axmed Madoobe oo khudbad ka jeedinaayay furitaanka Kal-fadhiga 3-aad ee Golaha Wakiilada Jubbaland ayaa waxa uu sheegay in uu raadinayo Midnimo iyo wadajir Jubbaland oo dhan ah, isla markaana haatan arrintaas guulo laga gaaray.
Madaxweynaha Jubbaland ayaa waxaa Carabka ku dhuftay in hada wixii ka danbeeya uu soo dhisi doono Xukuumad tayo leh oo ka dhabaysa himilooyinka Shacabka iyo filashada ay ka qaban Dowladooda.
Sidoo kale Axmed Madoobe ayaa bogaadiyay dadaalka ay wado Wasaarada Arimaha gudaha Jubaland ee lagu dhisayo golaha deegaanka Degmada Afmadow isagoo xusay in sidoo kale la bilaabi doono dhismaha golayaasha deegaanada Degmooyinka kale gaar ahaan Gobolka Gedo.
Ugu dambayntii Madaxweynaha ayaa uga mahadceliyay Xildhibaanada Baarlamaanka labaad ee dowlad Goboleedka Jubbaland shaqooyinka ay hayaan isagoo si rasmi ah u furay Kal-fadhiga Sadexaad ee Baarlamaanka Maamulkaas.
