Magaalada Jowhar ee Caasimadda maamulka Hirshabeelle ayaa waxaa laga dareemayaa Khilaaf siyaasadeed oo u dhexeeya Madaxweynaha Hirshabeelle Maxamed Cabdi Waare iyo Guddoomiyaha Baarlamaanka Maamulkaas Sheekh Cismaan Barre.
Guddoomiye Cismaan Barre oo xalay shil Jaraa’id ku qabtay Jowhar ayaa waxaa uu sheegay inuu qabtay Mooshin xilka looga qaadayo Madaxweyne Waare ayna u soo gudbiyeen Xildhibaano dhowr ah oo ka tirsan Hirshabeelle.
Waxaa uu sheegay Cismaan Barre in Mooshinka ay u soo gubiyeen Xildhibaano gaaraya 54 Xildhibaan, kuwaasi oo Madaxweyne Waare ku eedeeyay Musuq-maasuq iyo inuu ku xad-gudbay Dastuurka u yaalla maamulkaas, isagoo xusay in kulan uu isugu yeeri doono Xildhibaanada Mooshinka u soo gubiyay.
Dhinaca kale Guddoomiye ku-xigeenka Koowaad ee Baarlamaanka Hirshabeelle Cabdi Xuseen Geedi oo isna warbaahinta la hadlay ayaa waxaa uu sheegay inuu qabtay Mooshin xilka looga qaadayo Guddoomiyaha Baarlamaanka Maamulkaas Sheekh Cismaan Barre, ayna ku saxiixan yihiin 63-Xildhibaan.
Sidoo kale Guddoomiye ku-xigeenka Koowaad ee Baarlamaanka Hirshabeelle ayaa waxaa uu tilmaamay in kulan deg deg ah oo isugu yeeri doono Xildhibaanada Mooshinka u soo gudbiyay, si ay u gutaan waajibaadkooda shaqo.
Si kastaba Mooshinada iska soo horjeeda ee laga kala gudbiyay Madaxweynaha iyo Guddoomiyaha Baarlamaanka Hirshabeelle ayaa waxaa uu kusoo beegmayaa, iyadoo muddo xileedka Madaxda Hirshabeelle ay ka harsan tahay bilooyin kooban.
