Meydka Marxuum Cabdinaasir Dahable oo laga dejiyay Magaalada Hargeysa

Meydka Cabdinasir Muuse Dahable, oo katirsanaa Shaqaalaha Hay’adda maamulka hawada ee dowladda Soomaaliya oo dhawaan lagu dilay magaalada Muqdisho ayaa saaka laga dejiyay Garoonka diyaaradaha Cigaal ee magaalada Hargeysa.

Diyaarad ayaa looga qaaday Garoonka Muqdisho Meydka marxuum Cabdinasir Muuse, taasi oo geysay Hargeysa, waxaana Maanta lagu wadaa in lagu aaso magaalada Gabiley ee xarunta Gobolka Gabiley, sida ay sheegeen qaar kamid ah Eheladiisa.

Allaha u naxariistee Cabdinasir Muuse ayaa maalmo kahor meydkiisa laga helay gurigii uu ka daganaa magaalada caasimadda ah ee Muqdisho oo lagu dilay, isagoona la tilmaamay inay jirkiisa ka muuqdeen xilligii loo tagayay jirdilo.

Booliiska Soomaaliya oo war kasoo saartay geerida sarkaalkan ayaa sheegay in Lix Eedeysane loo soo xiray dilka Marxuum Cabdinaasir Muuse oo 32-jir ahaa, Cabdinaasir ayaa kamid ahaa Shaqaalaha Hay’adda maamulka hawada ee dowladda Soomaaliya.

Si kastaba Cabdinasir Muuse Dahable ayaa kasoo laabtay waxbarasho dibada ah oo la xariirtay cilmiga Hagidda Hawada, isagoo horey uga mid ahaa Shaqaalaha ICAO qeybteeda Hargeysa, Maamulka Somaliland ayaana dilka marxuumka ku eedaysay dowlada Soomaaliya.

About Dalsan Editor

View all posts by Dalsan Editor