Koox Dhakhaatiir ka hawlgasha Isbitaal ku yaalla Caasimadda dalka Switzerland ee Bern ayaa ku guuleystay inay kala waaxaan gabdho mataano ah, kuwaasi oo la rumeysan yahay inay yihiin carruurtii Mataanaha ee ugu da’da yaraa, oo iyagu dhalan muddo 8 maalmood oo keliya.
Dhakhaatiir tiradoodu dhan tahay 13-qof ayaa ka qeyb galay Hawlgalkaasi oo qaatay in ka badan 5 saacadood, iyadoo Qaliinka noocaasi ah yahay mid naadir ku ah Caalamka, taasi oo la micno ah in Qaliinka noocaasi lagu guuleysan karo 1% .
Labada Gabdhood ee Mataanaha ee lagu guuleystay in la kala waaxeeyo ayaa lagu kala magacaabaa Lydia iyo Maya, waxayna isaga dheganaayeen Beerka oo keliya.
Dhakhaatiirta fulisay Qaliinka waxay sheegeen inay u qorsheysnayd inay labada Mataano kala waaxaan marka ay gaaraan dhowr bilood, balse waxaa Qaliinka soo dedejiyey, kadib, markii ay labada ilmo la soo gudboonaatay xaallad cabsi nololeed (A life-threatening condition).
Mid ka mid ah Mataanaha ayaa la sheegay inuu ahaa mid dhiig badan leh, isla markaana uu sarreeyey Cadaadiska Dhiigga (very high blood pressure), halka midka kale ahaa mid aan lahayn dhiig ku filan.
Hadal ka soo baxay Isbitaalka ayaa lagu sheegay in Qaliinadda Mataanayaasha aad u yar lagu kala waaxayo uu yahay kii ugu horreeyey ee lagu guuleystay, iyadoo kuwii hore ahaan jireen kuwo lagu guul-daraysan jirey.
Waxaa Turjumay: Axmed Xaaji Ugaaska
©Radio Dalsan
