Mareykanka oo 700 Million oo doolar ku bixinaya wax ka qabashada Abaaraha dalka ku dhuftay

Mareykanka ayaa Soomaaliya ugu deeqay 700 malyan oo doolar si wax looga qabto abaaraha ka taagan dalka, oo haatan la sheegay inay marayaan marxalad aan caadi ahayn, iyadoo meelaha qaar laga soo sheegayo dhimasho ay sabab u tahay abaartu.

Safaaradda dalka Mareykanka ee Soomaaliya ayaa shaaca ka qaadday in deeqdaasi la gaarsiin doono dadka dhibaateysan, waxaana ka qayb qaadan doono Hay’adaha kala duwan ee horay gacanta uga gaysan jiray gar-gaarka iyo taakulaynta shacabka dhibaateysan.

Hay’adaha USAID iyo OCHA ayaa ka qeyb qaadanayaa sare u qaadidda howlaha gargaarka ah ee loo fidinayo shacabka ay saameeyeen abaaraha ka taagan Soomaaliya, sida ay sheegtay safaaradda Mareykanka ee Soomaaliya.

Dhibaatooyinka ka dhashay abaarta ba’an ee Soomaaliya ka taagan ayaa saamaynteeda maalin ba mid dhiillo leh laga soo sheegayaa, Halista ugu weyna waxay timid kaddib markii la waayey roobabkii di’i jirey afar xilli oo isku xiga.

Hay’adaha gargaarka ayaa ka digay dhibaatada ka dhalan karta abaaraha Soomaaliya oo maraya marxalad aad u adag.

Gobolada ayaa la aaminsan yahay in dhammaan ay saameysay abaartu, waxaana meelaha qaar la sheegay in ay dad badani dhimasho qarka u saran yihiin, gaajo iyo harraad darti.

Sidoo kale dadka xoola dhaqatada ah ayaa ah kuwa sida daran ay u saameysay Abaarta ka jirta dalka, waxaana isi-soo taraya qayla dhaanta kasoo yeeraysa dadka Soomaaliyeed ee haatan la daala dhacaya dhibaatooyinka ay sababtay abaartu.

 

About Webmaster

View all posts by Webmaster