Dowladda Mlaaysia ayaa ku dhawaaqday in Safiirkii Waqooyiga Kuurya uu noqday qof aan laga jeclayn dalka Malaysia, isla markaana la cayriyey.
Danjire Kan Chol ayaa loo qabtay muddo 48-saacadood inuu kaga baxo dalka Malaysia,
Tallaabadan ayaa timid, isbuucyo kadib, markii nin la dhashay Hoggaamiyaha W/Kuurya bishii hore 13-dii lagu dilay Garoonka Diyaaradaha ee magaalladda Kuala Lampur.
Go’aanka masaafurinta ayaa la qaatay, kadib, markii uu Danjiruhu diiday inuu hor-tago Wasaaradda Arrimaha Dibedda Malaysia oo isaga u yeertay.
Dhinaca kale, Eedeysane u dhashay W/Kuurya oo la sii daayey ayaa sheegay inuu yahay Dhibane lagu xad-gudbay.
Ri Jong Choi ayaa hadalkaasi ka sheegay Shir Jaraa’id oo uu maanta ku qabtay caasimadda dalka Shiinaha ee Pejing, wuxuuna Dowladda Malaysia ku eedeeyey inay doonayso inay Sharaf-dhac u yeesho dalkiisa.
Kiiska lagu dilay Kim Jong Nam oo la dhashay Hoggaamiyaha W/Kuurya, Kim Jong Un ayaa xiisad Diplomaasiyadeed ka dhaliyey Dowladda Malaysia iyo W/Kuurya, waxaana falkaasi u xiran dhowr qof oo shisheeye ah, kuwaasi oo lala xiriirinayo dilka Kim Jong Nam oo la dilay bishii February 13-dii ee sannadkan.
©Radio Dalsan
