Madaxweynaha dowlad Goboleedka Koonfur Galbeed Soomaaliya Cabdicasiis Xasan Maxamed Lafta-gareen, ayaa shir Guddoomiyey shir looga hadlayey Amniga deeganada Maamulkaas oo ka qabsoomay Magaalada Baydhabo ee Xarunta Gobolka Baay.
Kulanka ayaa waxaa looga hadlay xaaladihii ugu danbeeyay ee amniga deegaanada Maamulka Koonfur Galbeed, isla markaana waxaa uu Madaxweynaha Warbixin ka dhageystay Saraakiisha ammaanka Maamulka ee ka qeyb galay kulankaas.
Madaxweyne Cabdicasiis Lafta-gareen ayaa sheegay inay muhiim tahay xoojinta amniga Caasimadda KMG ah ee Maamulka iyo dhammaan deegaanada kale, wuxuuna xusay in wax laga xumaado ay tahay qaraxyadii Is-miidaaminta ahaa ee laba maalin gudahood ka dhacay Magaalooyinka Baydhabo iyo Marka ee Xarunta Gobolka Shabeellaha hoose.
Saraakiisha kala duwan ee Ciidanka ayuu faray Madaxweyne Cabdicasiis Lafta-gareen inay xoojiyaan amniga, isla markaana laga hortago wax kasta oo keeni kara amni darro, sidoo kalena shacabka ayuu ka dalbaday inay wadashaqeyn la yeeshaan hay’addaha amniga.
Kulanka ayaa waxaa uu kusoo aaday, iyada oo jimcihii lasoo dhaafay qarax lagu dilay Wasiirkii Cadaaladda Koonfur Galbeed Xasan Ibraahim Lugbuur iyo qaar kamid ah ilaalladiisa, waxaa qaraxa ku dhaawacmay in ka badan 10 ruux oo shacab ah.
Qarax kale oo ahaa mid Is-miidaamin ah ayaa talaadadii hore waxaa lagu dilay Guddoomiyihii Magaalada Marka ee Xarunta Gobolka Shabeellaha Hoose Cabdullaahi Cali Axmed Waafow iyo Askar la joogtay, Al-shabaab ayaana sheegatay mas’uuliyada qaraxyadaas ka dhacay Baydhabo iyo Marka.