Wasiirka Amniga Maamulka Galmudug Axmed Macalin Fiqi ayaa si rasmi ah ula wareegay dhammaan baraha Koontaroolada ee ku yaalla Magaalada Gaalkacyo ee Xarunta Gobolka Mudug oo ay maamuli jireen Ciidamo Maleeshiyo beeled ah.
Wasiir Fiqi oo la hadlay warbaahinta ayaa waxaa u sheegay in dhamaan baraha Koontaroolada laga soo galo iyo kuwa Canshuuraha lagu qaado lagu wareejiyay Ciidamo Boolis ah, kuwaasi oo goobaha ka shaqeyn doona.
Sidoo kale Wasiirka amniga ayaa waxaa uu sheegay in Ciidanka Booliska looga baahan yahay inay wadashaqeyn la yeeshaan Shacabka Magaalada Gaalkacyo, wuxuuna shacabka ugu baaqay inay dhankooda la shaqeeyaan laamaha amniga.
Dhinaca kale Axmed Macalin Fiqi ayaa waxaa uu tilmaamay in deeganada Galmudug laga mamnuucay waxyaabaha maanka-dooriya oo uu ugu horreeyo Maandooriga loo yaqaano Khamriga.
Isaga oo sii hadlaayay Wasiika amniga Galmudug ayaa waxaa uu sheegay in shaqsigii lagu arko isagoo ka ganacsanaya ama isticmaala uu maamulka tilaabo sharciga waafaqsan ka qaadi doono.
La wareegida baraha Kontaroolada ayaa waxaa goob joog ahaa Xildhibaano ka tirsan labada Aqal ee Baarlamaanka Federaalka Soomaaliya , Wasiiro iyo madaxda maamulka Gobolka mudug iyo kan Gaalkacyo.
