Maamulka Gobolka Banaadir ayaa faah faahin ka bixiyay saameyn ballaaran oo uu geystay Roobkii xoogan oo xalay saacado xiriir ah ka da’yay gudaha Magaalada Muqdisho ee Caasimadda dalka.
Guddoomiye ku-xigeenka Howlaha guud ee Maamulka Gobolka Cumar Cali Cabdi iyo xubno kale ayaa kormeer ku tegay Guryo ku yaalla Caasimadda oo xalay ay galeen biyahii ka hooray roobkii da’ay.
Cumar Cali oo la hadlay warbaahinta ayaa waxaa uu sheegay in gurmad loo sameeyay qoysas danyar ahaa oo kunool xaafaddo ka tirsan Gobolka, kaasi oo uu saameeyay Roobka, isla markaana Guryihii deganaayeen ay biyo farabadan ka galeen.
Waxaa uu sheegay Guddoomiye ku-xigeenka Howlaha guud ee Maamulka in Roobka inta uu da’yay uu dumay Guri ku yaalla degmada Howlwadaag, lagana soo badbaadiyay dadkii ku sugnaa, uuna jirin wax khasaaro ah uu geystay Roobka.
Isaga oo sii hadlaayay Cumar Cali ayuu sheegay in Maamulka Gobolka uu dadaal ku bixin doono sidii biyaha looga saari lahaa waddooyinka, wuxuuna dadka wax heysta ugu baaqay inay gargaar gaarsiiyan dadka masaakiinta ah ee roobka uu sameeyay.
Qaar kamid ah waddooyinka waaweyn ee degmooyinka Gobolka Banaadir ayaa ah kuwa xiran kadib markii ay biyaha xareedda fadhiisteen, waxaana halkaas maristooda dhib ku qaba gaadiidka Mooto Bajaajta iyo kuwa gaarka loo leeyahay oo maraya waddooyin qardo-jeex.
Maalmihii lasoo dhaafay waxaa Magaalada Muqdisho laga dareemayay Kuleyl aad u daran , hayeeshee saaka Jawiga Caasimadda ayaa ah mid qaboow, waxaana Wadooyinka qaar dhex fadhiya Biyaha Roobkii xalay da’ay.
