Kooxo hubeysan ayaa duhurnimadii Maanta oo Jimco ah xaafad ka tirsan degmada Deyniile ee Gobolka Banaadir ku dilay Askari ka tirsanaa Ciidanka Nabadsugida dowladda Federaalka Soomaaliya.
Dad goobjoogaal ah ayaa waxaa ay sheegeen in rag ku hubeysan Bastoolado ay Askariga ka tirsanaa Ciidanka Nabadsugida ku dleen xaafadda Daadsaney, xili uu kasoo baxay Masjid uu kusoo tukaday Salaadii Jimcaha.
Wararka ayaa intaas waxaa ay kusii darayaan in dilka askariga, kaddib Ciidamo ku sugnaa meel aan sidaas uga fogeyn goobta, ay iyaguna dileen nin la sheegay inuu ka dambeeyay dilkaasi Askriga loo geystay, xili ay baxsaneysay kooxdii falka fulisay.
Ciidamo ka tirsan kuwa Booliska dowladda ayaa durbadii sida caadada aheyd tegay halka lagu dilay Askariga ka tirsanaa Nabadsugida, iyagoona qaaday Meydka Askariga oo magaciisa lagu sheegay Muuse Daahir.
Maalmihii dambe ayaa waxaa Magaalada Muqdisho kusoo batay dilalka qorsheysan oo ay geysanayaan kooxo ku hubeysan Bastoolado, waxaana dilalka ka dhaca Caasimadda Muqdisho sheegta Al-shabaab.
