Maamulka Koonfur Galbeed Soomaaliya ayaa shaciyay inay ka xun yihiin tallaabada uu qaaday Guddoomiyaha Guddiga doorashooyinka heer Federaal Muuse Geellle Yuusuf, iyagoona eedeyn kulul u jeediyey Guddoomiyaha Guddigaas.
War kasoo baxay Madaxtooyada Koonfur Galbeed ayaa waxaa lagu sheegay in Muuse Geelle uu bartilmaameedsaday kuraas deegaanno gaar ah laga soo doortay, isla markaanaa arrintaas ay tahay mid sharci darro ah oo khilaafsan heshiisyadii iyo habraacyadii doorashooyinka.
Maamulka uu hoggaamiyo Madaxweyne Cabdicasiis Lafta-gareen ayaa caddeeyay in faylasha Xildhibaanada lagu doortay Koonfur Galbeed ay si toos ah ugu wareejinayaan Xoghayeyaasha Labada Aqal ee Barlamaanka JFS, maadaama Guddiga uu lumiyay waajibaadkii loo igmaday iyo madaxbannaanidii laga sugayay.
“Hoggaanka SEIT oo kaashanaya xubnaha Guddiga Hirgelinta Heer Federaal ee ka hawl galayay Koonfur Galbeed waxay si toos ah ugu wareejinayaan faylasha xildhibaannada Xoghayeyaasha Labada Aqal ee Barlamaanka JFS” ayaa lagu yiri Qoraalka Madaxtooyada.
Ugu dambeyn Koonfur Galbeed ayaa tilmaamtay inay xoojineyso in la dadajiyo dhaarinta iyo guda galka doorashooyinka, iyagoona ka dhigay tallaabooyinka lagu dheereysanayo muddo xileedka kaasoo ay ka shaqeynayaan qaar kamid ah xafiisyadii loo igmaday inay hawshan si hufan usoo gabagabeeyaan.
