Maamulka Hirshabeelle ayaa shaaca ka qaaday in Guddiga doorashooyinka Federaal u gudbiyeen Xildhibaanada lagu soo doortay labada deegaan doorasho ee Hirshabeelle oo tiradooda guud ay ahayd 28 Mudane oo Golaha Shacabka iyo 8 Mudane oo Aqalka Sare ah.
War-saxaafadeed kasoo baxay Madaxtooyada Hirshabeelle ayaa lagu sheegay in Guddoomiyaha Guddiga FEIT ee Muuse Geelle uu shaaciyay tirada xildhibaanada cusub ee lasoo doortay, waxaana laga reebay kursiga tirsigiisu yahay HOP086 oo Kamid ahaa kuraastii Golaha shacabka uu soo gudbiyay gudiga doorashada SEIT ee Hirshabeelle.
Sidoo kale Hirshabeelle ayaa caddeysay in kursiga HOP086 oo kusoo baxay Fahad Yaasiin Xaaji Daahir uu soo maray dhammaan habraacyadii loogu talagalay doorashooyinka , mana jirin wax dacwo ah oo timid beesha leh kursiga ama murashaxiintii ku tartantay.
“Maadaama Guddoomiyaha Gudiga uu ku kacay talaabooyin aan waafaqsanayn heshiisyadii iyo habraacyadii doorashada, waxay Guddiga SEIT ee Hirshabeelle si toos ah ugu gudbinayaan liiska rasmiga Xoghayeyaasha Labada Aqalka ee Barlamaanka Federaalka” ayaa lagu yiri Qoraalka kasoo baxay Maamulka Hirshabeelle.
Ugu dambeyntii, Hirshabeelle ayaa Guddiga FEIT uga digtay in aan la siyaasadeyn habsami usocodka doorashooyinka dalka, lana dhowro heshiisyadii Golaha wadatashiga qaran, si looga fogaadaa wax kasto oo dib u dhac u keeni kara Doorashooyinka guud ee dalka.
Guddiga doorashooyinka heer Federaal ayaa Fahad Yaasiin Xaaji Daahir ka reebay Liiska Xildhibaanada cusub ee Golaha Shacabka Baarlamaanka 11-aad ee Hirshabeelle u soo gudbisay Guddiga doorashooyinka Federaalka, iyadoo hore Guddiga u joojiyey doorashada kursiga tirsigiisu yahay HOP086.
