Faah faahino dheeraad ah ayaa laga helayaa Qarax khasaaro geystay oo Maanta ka dhacay deegaanka KM13 ee duleedka Magaalada Muqdisho.
Qaraxaasi oo ahaa miino nooca dhulka lagu aasay ayaa waxaa lala eegtay Kolonyo ay la socdeen Ciidamo ka tirsan kuwa Milateriga Soomaaliya,isla markaana qaraxa waxaa uu haleelay mid kamid ah Kolonyada.
Dad goobjoogayaal ah ayaa waxaa ay sheegeen in qaraxa uu ahaa mid xoogan oo jugtiisa laga maqlay Xaafado ka tirsan duleedka Muqdisho.
Ugu yaraan saddex Askari oo kamid ah Ciidankii la socday Gaariga uu qarax qabsaday ayaa ku dhaawacmay, waxaana loo qaaday mid kamid ah Goobaha Caafimaadka ee Magaalada,waxaana Ciidanka ay ka yimideen dhinaca Gobolka Shabeellaha Hoose,iyadoona kusoo jeeday guadaha Magaalada Muqdisho.
Wararka ayaa intaasi waxaa ay ku daraayan in qaraxa,kadib la maqlay rasaas xoogan ay rideen Ciidanka dowladda,taasi oo aan weli la shaacin Khasaaraha ka dhashay.
Duleedka Magaalada Muqdisho ayaa waxaa mararka qaar qaraxyo kala duwan lagula eegtaa Ciidamada dowladda iyo kuwa AMISOM xiliyada halkaasi ay ku socdaalayaan,isla markaana waxaa ka dhasha Khasaaro isugu jira dhimasho iyo dhaawac,waxaana Mas’uuliyadooda sheegta Al-shabaab.
