Waxaa xalay markale Goob fagaare ah oo ku taalla Magaalada Boosaaso ee Xarunta Gobolka Bari lagu gubay qaad farabadan oo si qarsoodi ah loo soo gelin rabay gudaha Boosaaso.
Ciidamo ka tirsan kuwa amniga Boosaaso ayaa howlgalka ay sameeyeen kusoo qabtay qaadka, isla markaana xalay gubay, waxaana howlgalkaas faah faahin ka bixiyay Taliska Ciidamada Booliska Gobolka Bari.
Taliyaha Qeybta Booliska Gobalka Bari G/sare Xussen Cali Maxamuud oo warbaahinta la hadlay ayaa waxaa uu sheegay in qaadka la gubay la doonayay in si qarsoodi loo soo geliyo Magaalada Boosaaso oo horey ay u manuucday Puntland.
Waxaa uu sheegay Taliyaha in si walbo oo la isku dayo in qaad lagu soo geliyo Boosaaso ay Ciidanka amniga ka hortegi doonaan, isla markaana tallaabo adeg laga qaadi doono dadka ka ganacsada qaadka.
Taliye Xuseen ayaa u mahadceliyay laamaha amniga Gobolka Bari oo markii labaad gacanta ku dhigay qaadka, isagoo shacabka ka dalbaday inay la shaqeeyaan laamaha amniga si looga hortego keenida qaadka Magaalada Boosaaso.
Maamulka Puntland ayaa kal horey deegaanadooda uga mamnuucay keenida iyo ka ganacsiga qaadka si looga hortego faafida Cudurka Coronavirus oo kusii faafaya Caalamka oo dhan ah.
