Ciidamo ka tirsan kuwa amniga dowladda Soomaaliya ayaa xalay waxaa ay howlgalo ka sameeyeen deegaanka Ceelasha Biyaha ee duleedka Magaalada Muqdisho.
Ciidamada ayaa howlgalka inta badan ka sameeyay Xaafado ku yaalla Ceelasha Biyaha,waxaana ay kusoo qabteen dad u badan dhalinyaro,kuwaasi oo looga shakiyay falal amniga darro.
Dadka deegaanka ayaa sheegay in Ciidamada dadkii ay howlgalka ku qabteen ay isugu geeyeen goob barxad ah,isla markaana weydiinayay su’aallo la xiriira dhan ah amniga.
Sidoo kale Ciidamada oo isku shaandhayn ku sameeyay dadkaasi, ayaa intooda badan dib u sii daayay,halka kuwo kalena ay wateen sida dadka deegaanka ay tilmaameen.
Howlgalkii xalay laga sameeyay deegaanka Ceelasha Biyaha ee duleedka Magaalada Muqdisho ayaa waxaa uu ahaa mid lagu xaqiijinayo amniga ka jira halkaas,waxaana uu kusoo aadayaa xili habeen horey Saldhig Ciidamada dowladda ku leeyihiin Tuulada Arbacow lagu soo qaaday weerar.
